სასჯელაღსრულების მე-7 დაწესებულება დღეს ოფიციალურად დაიხურა.

განსაკუთრებული რისკის პენიტენციური დაწესებულების დახურვას მინისტრი კახა კახიშვილი, არასამთავრობო ორგანიზაციებისა და მედიის წარმომადგენლები დაესწრნენ. წერს 1tv.

გარდა ამისა, 2018 წლის 25 ივნისს გაიხსნა მაღალის რისკის დაწესებულება, რომელიც 29 მსჯავრდებულზეა გათვლილი და ევროპულ სტანდარტებს შეესაბამება.

სასჯელაღსრულების სამინისტროს ინფორმაციით, ახალ პენიტენციურ დაწესებულებაში გამოყოფილია სპეციალური სივრცე გრძელვადიანი პაემნებისთვის, რომლებიც აღჭურვილია საჭირო ავეჯით, ტექნიკით, გაგრილებისა და გათბობის სისტემით. დაწესებულებაში განთავსებულია ადვოკატთან შეხვედრის ოთახი. საცხოვრებელ სივრცეში მოწყობილია სამზარეულო, სველი წერტილი და საძინებელი.

როგორც სამინისტროში აცხადებენ, თანამედროვე სტანდარტების შესაბამისი დაწესებულების მოწყობა სასჯელაღსრულებისა და პრობაციის სამინისტროს ბიუჯეტიდან დაფინანსდა. ახალგახსნილი დაწესებულება უკვე დაათვალიერეს არასამთავრობო ორგანიზაციების წარმომადგენლებმა, უფლებადამცველებმა და აღნიშნეს, რომ ახალ N7 მაღალი რისკის პენიტენციურ დაწესებულებაში მსჯავრდებულებს ცივილიზებულ, ევროპული სტანდერტების შესაბამის გარემოში მოუწევთ სასჯელის მოხდა.